ضربِ کلیم 182: غلاموں کی نماز

کہا مجاہدِ تُرکی نے مجھ سے بعدِ نماز
طویل سجدہ ہیں کیوں اس قدر تمھارے امام

تشریح:

ترکی وفد میں سے ایک ترک مجاہد نے مجھ سے بعد از نماز دریافت فرمایا کہ آپ کے ہندی امام اس قدر طویل سجدہ کیوں کرتے ہیں؟

وہ سادہ مردِ مجاہد، وہ مومنِ آزاد
خبر نہ تھی اُسے کیا چیز ہے نمازِ غلام

تشریح:

وہ سادہ طبع مجاہد انسان اور آزاد مومن اس بات سے بے خبر تھا کہ غلاموں کی نماز کیا چیز ہوتی ہے۔ اُسے معلوم نہ تھا کہ غلام قوم کے افراد کی غلامانہ ذہنیّت سے نماز میں کیا فرق آجاتا ہے۔ یعنی اُنہیں اور تو کوئی قومی کام نہیں ہوتا، بس ان لمبے لمبے سجدوں ہی میں وہ اپنی نجات سمجھتے ہیں۔

ہزار کام ہیں مردانِ حُر کو دُنیا میں
انھی کے ذوقِ عمل سے ہیں اُمتّوں کے نظام

تشریح:

آزاد مردوں کو دنیا میں اور بھی ہزاروں کام ہیں اور انہی کی لذتِ عمل سے قوموں کے انتظامی سلسلے برقرار و قائم رہتے ہیں۔ آزاد قوم کے باشندوں کو اتنی فرصت ہی کہاں ہوتی ہے کہ طویل سجدوں میں پڑے رہیں، کیونکہ وہ وقت کی قدر کرتے ہیں اور عبادت سے فارغ ہو کر اپنے نصب العین کی طرف گامزن ہو جاتے ہیں۔گویا یہ مردانِ حُر (آزاد مرد) اپنی قوم کی ترقی اور بلند مرتبگی کے لیے کوشاں رہتے ہیں اور انہی کی بدولت قوم سکون و راحت اور خوشی و خوشحالی کی زندگی بسر کرتی ہے۔

بات یہ ہے کہ قوموں کے مراتب عمل اور کام کرنے کی لذت سے حاصل ہوتے ہیں۔ رزم ہو یا بزم، امن ہو یا جنگ، ہر دور میں ان کے لیے ہزار قسم کی باتیں سوچنے اور کرنے کی ہوتی ہیں، لیکن غلام ان ذمہ داریوں سے آزاد ہوتا ہے اور آقاؤں کی مرضی پر چلتا ہے۔ خود بے حس اور بے ذوقِ عمل ہوتا ہے۔

بدن غلام کا سوزِ عمل سے ہے محروم
کہ ہے مروُر غلاموں کے روز و شب پہ حرام

تشریح:

ان مجاہدوں کے برعکس غلاموں کے جسم میں عمل کا جوش و جذبہ ہوتا ہی نہیں ہوتا۔ ایک غلام انسان اس نصب العین سے واقف ہی نہیں ہوتا، اس لیے اُس کے سامنے عملی پروگرام ہی نہیں ہوتا، چنانچہ وہ عملی زندگی میں کوئی حرارت نہیں رکھتا۔ بے عمل ہونے کی وجہ سے غلاموں کے شب و روز گردِش (مرُور) سے محروم ہوتے ہیں۔

؎ آزاد کی اِک آن ہے محکوم کا اک سال
کس درجہ گراں سَیر ہیں محکوم کے اوقات
(ضربِ کلیم: ہندی مکتب)

گویا ان کے دِن رات ایک جیسے ہی رہتے ہیں۔ مراد یہ ہے کہ زمانے کی گردش ان کے حالات پر کوئی اثر نہیں ڈالتی اور نہ ہی اُن کی تقدیر بدلتی ہے۔ وجہ یہ ہے کہ تقدیر ہمارے عمل پر موقوف ہے۔ بقول اقبالؔ:-

؎ ’ہر لحظہ ہے قوموں کے عمل پر نظر اُس کی
بُرّاں صفَتِ تیغِ دو پیکر نظر اس کی!‘
(ضربِ کلیم: تقدیر)

طویل سجدہ اگر ہیں تو کیا تعجُّب ہے
ورائے سجدہ غریبوں کو اَور کیا ہے کام

تشریح:

اگر ہندوستان کے امام طویل سجدہ کرتے ہیں تو اس میں تعجب کی کیا بات ہے۔ سجدوں کے علاوہ (ورائے سجدہ) اور ان غریبوں کو کام بھی کیا ہے۔ نہ قواعدِ پریڈ سے کوئی تعلق ہے، نہ اپنے گھوڑے کی نگہداشت سے کوئی علاقہ ہے، نہ اپنے ہتھیاروں کی صفائی کی ضرورت ہے، نہ رات کو سرحدوں کی حفاظت کا کام ہے، نہ جسمانی ورزش کی ضرورت ہے اور نہ ہی مسلمانوں کے گھروں پر جا کر اُنہیں جہاد کی ترغیب دینے کی ضرورت ہے۔ غلامی کی ”نعمت“ نے مسلمانوں کو ان تمام ”زحمتوں“ سے بری الذمہ کر دیا ہے۔ یوں بھی اگر دیکھا جائے تو غلام قومیں ہمیشہ اپنے آقاؤں کے سامنے جھکی رہتی ہیں اور اُن کی محتاج ہوتی ہیں۔

خدا نصیب کرے ہِند کے اماموں کو
وہ سجدہ جس میں ہے مِلّت کی زندگی کا پیام!

تشریح:

اللہ تعالی سے میری دُعا ہے کہ ہندوستان کے پیش اماموں کو نماز میں ایسے سجدے کرنے کی توفیق ہو جن میں مِلّت کی زندگی کا پیغام مضمر ہو (یعنی ایسے سجدے جو مِلّت کی سربلندی اور عظمت کا باعث بن جائیں) اور جب وہ سبحان ربی الاعلی کہہ کر سب سے اعلیٰ رب کی پاکی بیان کریں تو قوم کو واقعی درس دیں کہ سب سے اعلی اور ارفع جس کی غلامی کا شرف حاصل کرنا چاہیے وہ اللہ تعالی کی ذاتِ پاک ہے نہ کہ دنیا کے عوام اور اقوام۔