ضربِ کلیم 11: عِلم و عشق

علم نے مجھ سے کہا عشق ہے دیوانہ‌ پن
عشق نے مجھ سے کہا علم ہے تخمین و ظن

تشریح:

اربابِ علم کہتے ہیں کہ اصحابِ عشق دیوانے ہوتے ہیں، یعنی ایسی باتیں کرتے ہیں جو عقل کےخلاف ہوں۔ اس کے جواب میں اصحابِ عشق کہتے ہیں کہ عُلماء یعنی حکماء و فلاسفہ، ساری عمر قیاس اور گمان کی وادیوں میں سرگرداں رہتے ہیں۔

تخمین و ظن: تخمین کے معنی اندازہ، قیاس اور گمان کے ہیں اور ظن کے معنی یقین اور شک کی درمیانی حالت کے ہیں۔ اقبالؔ رموزِ بیخودی میں فرماتے ہیں:-

؎ عقل در پیچاکِ اسباب و علل
عشق چوگان بازِ میدانِ عمل
ترجمہ: عقل اسباب اور وجود کے چکر میں پڑی رہتی ہے؛ عشق میدان عمل کا شہسوار ہے۔
(رموزِ بیخودی: درمعنی حُریتِ اسلامیہ و سِرّ حادثۂ کربلا)

بندۂ تخمین و ظن! کِرمِ کتابی نہ بن
عشق سراپا حضور، علم سراپا حِجاب!

تشریح:

اس شعر میں اقبالؔ علم کے پُجاری کو پکارتے ہوئے کہتے ہیں کہ کتابی کیڑا مت بن! جو کچھ کتابوں میں لکھا ہے اسی پر اکتفا نہ کر، اسے زیادہ سے زیادہ سمجھ، کیونکہ منزل تو بہت آگے ہے اور تجھے منزل تک صرف عشق ہی پہنچائے گا۔ یاد رکھ کہ معرفت کتابوں سے حاصل نہیں ہو سکتی۔

مثلاً کوئی فلسفی آج تک یہ نہیں بتا سکا کہ خدا کیا ہے؟ انسان کیا ہے؟ روح کیا ہے؟ روح اور کائنات میں کیا رِشتہ ہے؟ مختصر یہ کہ علم تو حجابات پیدا کرتا ہے۔ اگر ایک سوال کا جواب دیتا ہے تو اُس جواب سے مزید سوالات پیدا ہوتے ہیں۔ ہاں! عشق سے تمام حجابات دُور ہو جاتے ہیں اور حقیقت تک رسائی ہو جاتی ہے، اسی لیے عشق کا مرتبہ عقل سے بلند تر ہے۔

علم بیشک ضروری ہے لیکن حقیقت تک پہنچنے کے لیے بیکار ہے۔ نظم علم و عشق میں اقبال اس بات کا یقین دلاتے ہیں کہ علم کی تکمیل کے بعد عشق کے راستہ پر بھی آنا ضروری ہے کیونکہ وہم و گمان کی راہ پر چلنا دانشمندی نہیں ہے۔ حقیقت علم پر نہیں کھُلتی۔ اس کے برعکس عشق اختیاری تجھے حضورِ ذات تک پہنچا دے گی۔ تمام پردے اُٹھ جائیں گے اور حقیقت عیاں ہو جائے گی۔

؎ گزر جا عقل سے آگے کہ یہ نُور
چراغِ راہ ہے، منزل نہیں ہے
(بالِ جبریل)

عشق کی گرمی سے ہے معرکۂ کائنات
علم مقامِ صفات، عشق تماشائے ذات

تشریح:

اس کائنات کے معرکے میں جو حرارت و گرمی اور رونق ہے، وہ عشق ہی کی بدولت ہے۔ علم سے ذاتِ ایزدی کی صفات کے بارے میں صرف معلومات حاصل ہو سکتی ہیں جبکہ عشق کی برکت سے اس ذاتِ اقدس کا دیدار نصیب ہو جاتا ہے۔

بقول کانٹ عقل کی مدد سے ہم صرف مظاہر کو جان سکتے ہیں، حقائق تک رسائی حاصل نہیں کر سکتے۔ کانٹ نے اپنی شہرۂ آفاق کتاب ”تنقیدِ عقلِ خالص (Critique of Pure Reason)“ میں اِس مسئلہ کو بڑی شرح و بسط کے ساتھ بیان کیا ہے۔ انگریزی میں مظاہر کے لیے Phenomena اور حقائق کے لیے Noumena کی اصطلاحیں استعمال کی ہیں۔

واضح ہو کہ عاشق سے اقبالؔ کی مُراد فرہادؔ یا قیسؔ کی قسم کے عاشق نہیں، بلکہ عاشق سے مراد ہے وہ شخص جو اللہ کے عشق میں سرشار ہو اور کسی مُرشدِ کامل کی صحبت میں بیٹھ کر اُس سے تزکیہ و تصفیۂ نفس کر لیا ہو۔ مثلاً حضرت صدیقِ اکبرؓ، حضرت فاروقِ اعظمؓ، حضرت مولانا رومؓ، حضرت خواجہ معین الدین چشتیؓ، حضرت مجدد الف ثانیؓ، حضرت مجدد دہلویؓ۔

عشق سکُون و ثبات، عشق حیات و ممات
علم ہے پیدا سوال، عشق ہے پِنہاں جواب!

تشریح:

زندگی میں اگر سکون و ثبات ہے تو وہ عشق ہی کی بدولت ہے۔ موت و حیات کے راز کو علم نہیں، عشق کھولتا ہے۔ مثلاً رُوح کے آثار و مظاہر کو دیکھ کر ایک منطقی روح کے متعلق کچھ قیاسات پیش کر سکتا ہے، لیکن روح کی حقیقت کیا ہے، یہ صرف ایک عاشق ہی سمجھ سکتا ہے۔

الغرض عشق کی بدولت یہ کائنات زندہ ہے اور اس میں جو عملِ ارتقاء نظر آتا ہے، سب عشق کا کرشمہ ہے۔ عشق سے قلب کو اطمینان اور روح کو ثبات حاصل ہوتا ہے۔ علم تو شکوک و شبہات پیدا کرتا ہے، یہ ایک ایسا ظاہری سوال ہے جس کے پاس کوئی جواب نہیں۔ اس ظاہری سوال کا پوشیدہ جواب اگر کسی کے پاس موجود ہے تو وہ عشق ہے۔ جس بات کو اور جس حقیقت کو علم نہیں سمجھتا، عشق اس کو سمجھ بھی لیتا ہے اور پا بھی لیتا ہے۔ اس لیے علم پر بھروسا کرکے نہ بیٹھے رہو بلکہ عشق اختیار کرو۔

؎ وہ پُرانے چاک جن کو عقل سی سکتی نہیں
عشق سِیتا ہے اُنھیں بے سوزن و تارِ رَفو
(ارمغانِ حجاز)

عشق کے ہیں معجزات سلطنت و فقر و دِیں
عشق کے ادنیٰ غلام صاحبِ تاج و نگیں

تشریح:

سلطنت، حکومت، فقر اور دین، یہ سب عشق ہی کے معجزات یا کارنامے ہیں اور بڑے بڑے بادشاہ، اربابِ عشق کے سامنے غلاموں سے زیادہ حیثیت نہیں رکھتے۔ دُور کیوں جائیے، ہندوستان کی تاریخ کا مطالعہ کیجیے۔ سلطان شمس الدین ایلتمش، حضرت خواجہ قطب الدین بختیار کاکی کے سامنے بڑے ادب کے ساتھ ہاتھ باندھے کھڑا ہوتا تھا۔ اسی طرح سلطان علاؤالدین خلجی اِس آرزو میں رہا کہ حضرت محبوبِ الہی سلطان المشائخ حضرت نظام الدین اولیاء کبھی اس کے دربار میں تشریف لائیں یا اُسی کو حاضری کی اجازت دیں۔ لیکن اُس کی یہ آرزو کبھی پوری نہ ہو سکی۔ اسی لیے اقبالؔ نے یہ لکھا ہے:-

؎ پادشاہاں در قباہای حریر
زرد رو از سہم آں عریاں فقیر
ترجمہ: ایسے عریاں فقیر کی ہیبت سے ریشمی قباؤں میں ملبوس پادشاہوں کے چہرے زرد پڑ جاتے ہیں۔
(پس چہ بائد کرد: مردِ حُر)

کچھ ایسے ہی ایمان و احساس کا نتیجہ تھا وہ پیغام جو حضرت بو علی قلندرؒ نے شاہِ وقت کو بھیجا تھا، یہ واقعہ اقبالؔ نے اسرارِ خودی میں بیان فرمایا ہے۔

واقعہ ہے کہ بو علی قلندرؒ کا مرید، جو شرابِ معرفت سے سرمست تھا، بازار گیا۔ شہر کے حاکم کی سواری بھی وہاں سے گزر رہی تھی۔ ایک چوبدار نے کہا کہ اے نا سمجھ! حاکم کے ہمراہیوں کا راستہ نہ روک۔ مگر وہ درویش سر جھکائے اپنے افکار میں مست اسی طرح چلتا رہا۔ تکبر میں مست چوبدار نے درویش کے سر پر لاٹھی دے ماری۔ وہ درویش حکمران کے ہاتھوں ناخوش اور افسردہ گیا اور جا کر حضرت بو علی کے سامنے فریاد کی اور آنسو بہائے۔

یہ سُن کر شیخ پہاڑ پر گرنے والی بجلی کی مانند اپنی گفتگو سے شعلہ بار ہوئے اور مُنشی کو بلا کر فرمایا کہ فقیر کی طرف سے پادشاہ کو فرمان لکھے کہ میرے درویش کو تیرے عامل نے سر پر لاٹھی ماری ہے؛ یہ کام ایسا ہے کہ اُس کی متاعِ جان کو جلا دے گا۔ اس بد نہاد عامل کو یہاں سے واپس بلا؛ ورنہ میں تیری بادشاہت کسی اور کو دے دوں گا۔ یہ پڑھ کر بادشاہ پر کپکپی طاری ہوگئی۔ اس کے رگ و پے میں رنج و غم کا طوفان امڈ آیا؛ اور اس کا چہرہ آفتابِ شام کی طرح زرد پڑ گیا۔ اس نے حاکم کی گرفتاری کا حکم جاری کیا اور قلندر سے اپنی غلطی کی معافی کا خواستگار ہوا۔

عشق مکان و مکیں، عشق زمان و زمیں
عشق سراپا یقیں، اور یقیں فتحِ باب!

تشریح:

الغرض عشق ہی اس کائنات میں سب سے بڑی طاقت ہے۔ عاشق عناصر پر حکمراں ہوتا ہے۔ زمان و زمین، مکان و مکیں سب عشق ہی کی بدولت اپنی جگہ پر قائم ہیں۔ عشق سے ظن و تخمین کا ازالہ ہو جاتا ہے اور یقین سے انسان کامیابی حاصل کر لیتا ہے۔ عشق ہی سے دولتِ یقین نصیب ہوتی ہے اور یقین ہی سے دروازے کھُلتے ہیں۔ اگر یقین نہ ہو تو انسان سعیِ مسلسل نہیں کرتا اور سعیِ مسلسل کے بغیر کچھ حاصل نہیں ہوتا۔ خواہ وہ دینی ہو یا دنیاوی۔ علم منزل کے راستے دِکھاتا ہے لیکن عشق منزل پر پہنچانے کا ذمہ دار ہوتا ہے۔ چنانچہ اقبالؔ لکھتے ہیں:-

؎ یقیں پیدا کر اے ناداں! یقیں سے ہاتھ آتی ہے
وہ درویشی، کہ جس کے سامنے جھُکتی ہے فغفوری
(بالِ جبریل)

؎ مہر و مہ و انجم کا محاسِب ہے قلندر
ایّام کا مَرکب نہیں، راکِب ہے قلندر
(ضربِ کلیم: قلندر کی پہچان)

شرعِ محبّت میں ہے عشرتِ منزل حرام
شورشِ طُوفاں حلال، لذّتِ ساحل حرام

تشریح:

علم یا عقل کا تقاضا یہ ہے کہ آدمی دنیا میں عیش و عشرت کے سامان مہیا کرے، لیکن یا عشق یا محبت کی شریعت (قانون) میں یہ بات حرام ہے۔ عقل کی نظر میں انسان کو طوفان سے بچنا چاہیے اور ساحل یعنی عافیت اختیار کرنی چاہیے۔ لیکن اس کے برعکس محبت کی شریعت میں لذتِ ساحل (عافیت کی زندگی) حرام ہے۔ وہ (عشق) تو مسلسل حرکت میں اور رواں دواں رہنے کا نام ہے۔ عشق ہنگاموں اور مصائب و آلام سے ٹکراتے ہوئے زندگی بسر کرتا ہے۔ ساحل کا سکون اس کی شان کے خلاف ہے۔ یعنی عشق آدمی کو عقل کے خلاف راستوں پر چلاتا ہے۔ چنانچہ بانگِ درا میں اقبالؔ لکھتے ہیں:-

؎ بے خطر کود پڑا آتشِ نمرود میں عشق
عقل ہے محوِ تماشائے لبِ بام ابھی
(بانگِ درا)

عشق پہ بجلی حلال، عشق پہ حاصل حرام
علم ہے اِبن الکتاب، عشق ہے اُمّ الکتاب!

تشریح:

الغرض عشق کا قانون یا طریقہ عقل کے ضابطہ یا دستور کے بالکل خلاف ہے۔ مثلاً عقل کہتی ہے کہ کھیتی کے خِرمن جمع کرو اور اُن سے فائدہ اُٹھاؤ۔ لیکن عشق کہتا ہے کہ زندگی کی اعلی اقدار کے لیے ادنی چیزوں مثلاً مال و دولت، گھر بار، سب قربان کردو۔ (چنانچہ صدیقِ اکبرؓ نے دو مرتبہ اپنا سارا گھر بار اور کُل اثاثۂ حیات، اللہ کی راہ میں قربان کر دیا تھا، جب ہی تو صدیقِ اکبرؓ کا لقب پایا، جس پر ساری کائنات کو رشک آیا)۔

خلاصۂ کلام: اقبال فرماتے ہیں کہ عقل، کتابوں کا نتیجہ ہے، یا کتابوں سے پیدا ہوتی ہے اور عشق، خود کتابوں کی ماں ہے، یعنی کتابی علوم اس کا نتیجہ ہیں۔