بانگِ درا 42: ہندوستانی بچوں کا قومی گیت

تعارف

علامہ اقبال کی یہ نظم فروری 1905ءکے ”مخزن“ میں ”ایک ہندوستانی لڑکے کا گیت“ کے عنوان سے شائع ہوئی۔ پھر نظرِ ثانی میں علامہ اقبال نے کُچھ ترامیم کیں اور ایک مکمل بند حذف کر دیا۔ بانگِ درا میں ”ہندوستانی بچوں کا قومی گیت“ کے نام سے رقم ہوئی۔

اِس نظم کا شمار بھی ترانۂ ہندی کی طرح اقبالؔ کی فکر کے دورِ اوّل میں ہوتا ہے۔ جس میں آپ نے وطن پرستی پر مبنی شاعری فرمائی۔ اِس نظم میں بھی آپ نے ہندوستان کی تعریفی شاعری کی ہے اور تقریباً ہر شعر میں تلمیح کے استعمال سے اس سرزمین کی عظمت کو اُجاگر کیا ہے۔

نظم کی لسانیّات

علامہ اقبال کی اِس نظم کا شمار ترجیح بند نظموں میں ہوتا ہے۔ ترجیح بند ایسی نظم کو کہا جاتا ہے جس میں ایک ہی ٹیپ کا مصرع، ہر کُچھ اشعار کے بعد دہرایا جائے۔ یہاں ہر بند کے آخر میں ”میرا وطن وہی ہے، میرا وطن وہی ہے“ کی تکرار ہے۔

ترجیح بند ہیئت میں لکھی نظم اور ہر بند کے تمام اشعار کا ہم قافیہ و ہم ردیف ہونا، نظم کو وہ نغمگیّت عطا کرتا ہے، جو ترانے کے لیے درکار ہے۔

بند نمبر 1

چشتیؒ نے جس زمیں میں پیغامِ حق سُنایا
نانک نے جس چمن میں وحدت کا گیت گایا

تاتاریوں نے جس کو اپنا وطن بنایا
جس نے حجازیوں سے دشتِ عرب چھُڑایا

میرا وطن وہی ہے، میرا وطن وہی ہے

تشریح:

وطن کی تعریف میں علامہ اقبال سب سے پہلے اس میں موجود دانشوروں کے ذکر سے شروع کرتے ہیں۔ اس کی عظمت کا باعث وہی دانِشور (Intellectual) افراد ہیں جو دنیا کے مختلف خِطّوں کو چھوڑ کر اِس وطن میں آ گئے۔

تبصرہ:

پہلے مصرعے میں خواجہ معین الدین چشتی کی طرف اشارہ ہے، جو خراسان سے ہند کے خطے میں آئے اور اس کو اپنا وطن بنایا۔ یہاں توحید کا پیغام پھیلایا اور اپنی خدمات کی وجہ سے ’غریب نواز‘ کا لقب پایا۔

جہاں ایک مسلم دانشور و صوفی کا ذکر کِیا، وہیں اِس دیس میں بسنے والے اور مذاہب سے وابستہ دانشمند جیسا کہ گرو نانک کو بھی سراہا۔ شعر میں اُن کی تعلیمات کا بطورِ خاص ذکر کیا، جنہوں نے پنجاب کی سرزمین کو وحدت کی تعلیم سے از سرِ نو روشناس کرایا اور اس خطّے میں موجود سماجی مسائل جیسا کہ طبقاتی نظام کو توڑا۔

تاتار ترک نسل کے لوگوں کی طرف اشارہ کرتا ہے۔ اس سے مراد وہ تمام ترک حکمران ہیں، چاہے وہ تیموری ہوں یا مغل بادشاہ، جنہوں نے (انگریزوں کے بر عکس) ہندوستان کی تہذیب و تمدّن کو اپنایا اور اس کو مزید ترقّی دی۔

حجازیوں سے مراد وہ عرب فاتحین اور آبادکار ہیں جو محمد بن قاسم کی مہم کے ساتھ سب سے پہلے سندھ پہنچے اور بعد ازاں یہیں آباد ہو گئے۔

بند کے پہلے چاروں مصرعوں میں صنعتِ تلمیح کا استعمال ہے۔ پہلے شعر میں ہند کی دو اہم شخصیات کی طرف اشارہ ہے جبکہ دوسرے شعر میں دو قوموں کی طرف۔

یہ، میرا وطن وہ ہے کہ جو تمام دُنیا کے لوگوں کا مرکز بنا رہا۔

بند نمبر 2

یُونانیوں کو جس نے حیران کر دیا تھا
سارے جہاں کو جس نے علم و ہُنر دیا تھا

مٹّی کو جس کی حق نے زر کا اثر دیا تھا
تُرکوں کا جس نے دامن ہیروں سے بھر دیا تھا

میرا وطن وہی ہے، میرا وطن وہی ہے

تشریح:

اس وطن کی مٹّی کی زرخیزی کا اندازہ اِس میں پیدا ہونے والے علم و فلسفے، زراعت اور معدنیات سے ہوتا ہے۔

تبصرہ:

ہندو فلسفہ، علم اور ہُنر قدیم دور سے اس سطح پر رہا ہے کہ اس نے یونانی (جو کہ علم اور فلسفے کا استعارہ مانے جاتے ہیں) تک کو حیران کر دیا تھا۔ قدیم ہندوستانی تہذیبوں، جیسا کہ وادیِ سندھ کی تہذیب (Indus Valley Civilization) کا صرف نقّاسی کا نظام ہی دورِ حاضر کے لیے حیرت کا باعث ہے۔ اس کے ریاضی دانوں کی ایجادات سے پوری دنیا مستفید ہوئی۔

اِس خطّے کی ذراعت کا ذکر ہو تو اس کی مٹی میں ایسا اثر ہے کہ دُنیا کی ہر فصل، پورا سال اِس میں اُگائی جا سکتی ہے اور اس کے معدنیات کے خزانوں نے اس کے ترک حکمرانوں کے حکومتی خزانے بھر دیے تھے۔ یہ وہی خزانے تھے جسکی بدولت مغل تختِ طاؤس پر شان سے بیٹھے، کوہِ نور کا ہیرا اُن کے تاج میں جڑا گیا اور وہ تاج محل جیسی عمارات بنانے میں کامیاب ہوئے۔

بند نمبر 3

ٹُوٹے تھے جو ستارے فارس کے آسماں سے
پھر تاب دے کے جس نے چمکائے کہکشاں سے

وحدت کی لَے سُنی تھی دنیا نے جس مکاں سے
میرِ عربؐ کو آئی ٹھنڈی ہوا جہاں سے

میرا وطن وہی ہے، میرا وطن وہی ہے

تشریح:

وہ ستارے، یعنی امراء، علماء، شعراء اور صوفیاء جو فارس (Persia) چھوڑ کر ہندوستان میں آ بسے، اُن کو اس سر زمین نے ایسی چمک (تاب) دی کہ وہ کہکشاں کے ستاروں کی طرح چمکنے لگے۔

تبصرہ:

وحدت کی لے سے مراد شری کرشن کی تبلیغ و تعلیمات ہیں۔

ہند سے میرِ عرب ﷺ کو ٹھنڈی ہوا آنے سے اس حدیث کی طرف اشارہ ہے:-

قال علي بن أبي طالب: أطيبُ ريحٍ في الأرض الهندُ، أُهبط بها آدمُ ﷺ، فعَلِقَ شجرَها مِن ريح الجنة

ترجمہ: سیدنا علی بن ابی طالب رضی اللہ عنہ نے فرمایا: ”زمین پر سب سے پاکیزہ اور خوشبودار ہوا ہندوستان کی ہے، آدم علیہ السلام کو وہیں اتارا گیا تھا، تو وہاں کے درختوں کے ساتھ جنت کی خوشبو چمٹ گئی تھی۔“
(المستدرك على الصحيحين، كتاب: تواريخ المتقدمين من الأنبياء والمرسلين، حدیث: 4039)

بند نمبر 4

بندے کلیم جس کے، پربت جہاں کے سِینا
نوحِؑ نبی کا آ کر ٹھہرا جہاں سفینا

رفعت ہے جس زمیں کی بام فلک کا زینا
جنّت کی زندگی ہے جس کی فضا میں جینا

میرا وطن وہی ہے، میرا وطن وہی ہے

تبصرہ:

جس کے بندوں کی خصوصیات موسیٰ عَلَيْهِ ٱلسَّلَام جیسی ہیں۔ حضرت موسیٰؑ کے کلیم اللہ ہونے کی خصوصیت مقصود ہے اور اس سے اشارہ یہاں کے لوگوں کا عرفانِ الہی ہے جو قدیم زمانے سے اس کی روایت رہی۔ اس ملک کے پربت و پہاڑ طُورِ سینا (Mount Sinai) کی طرح ہیں کیونکہ اس پر خدا کا جلوہ نمایاں ہے۔

ان پہاڑوں پر نبی نوح عَلَيْهِ ٱلسَّلَامُ کا سفینہ آنا ایک قدیم روایت کی طرف اشارہ ہے، جو پہلے سچ مانی جاتی تھی اور ہندوستانیوں کے لیے فخر کا باعث تھی، مگر جدید تحقیق سے یہ بات غلط ثابت ہوئی۔

اِس مُلک میں بسنے والے دانشوروں، اس کا علم و فلسفہ، سونا اُگلنے والی اس کی زمین اور اس کی قدیم میراث نے اس کی عظمت کو اتنا بڑھا دیا ہے کہ یہ آسمان کی چھت تک پہنچنے کی سیڑھی یا بامِ فلک کا زینہ بن گیا ہے اور ایسے وطن کی فضا میں جینا گویا جنت میں زندگی گزارنا ہے۔

یہ وہ ہندوستان کی عظمت و بلندی کا گیت تھا جس میں ہر اُس شے کا ذکر ہے جس پر ہر ہندوستانی بچے کو فخر ہونا چاہیے۔ مگر جلد ہی اقبالؔ کی فکر میں وہ ارتقاء آیا کہ جس میں یہ وطنی جذبہ یک دم عالمگیریّت اختیار کر گیا، یعنی محض ایک خطّہِ زمین ہی عظمت کا استعارہ نہیں بلکہ:-

؏ مسلم ہیں ہم، وطن ہے سارا جہاں ہمارا
(بانگِ درا: ترانۂ مِلّی)

تبصرہ

یہ ترانہ برصغیر کی مشترکہ تہذیبی میراث اور روحانی تقدیس کا والہانہ اعتراف ہے۔ اقبالؔ نے چشتیؒ کی حق گوئی، نانک کے توحیدی نغمے اور حضورِ اکرم ﷺ کی اس دھرتی کی طرف نسیمِ رحمت کے تذکرے کو یکجا کر کے نئی نسل میں اپنے وطن کی تاریخی عظمت، امن اور روحانی تشخص پر فخر کا لازوال جذبہ بیدار کِیا ہے۔

حوالہ جات

• [۱] شرح بانگِ درا از پروفیسر یوسف سلیم چشتی، صفحہ: ۱۳۷،۱۳۸
• [۲] شرح بانگِ درا از ڈاکٹر خواجہ حمید یزدانی، صفحہ: ۱۴۱-۱۴۳
• [۳] مطالبِ بانگِ درا از مولانا غلام رسول مہر، صفحہ:۹۴،۹۵
• [۴] آوازِ اقبال، از: نریش کمار شاد، صفحہ: ۱۱۰،۱۱۱
• [۵] شرح بانگِ درا از ڈاکٹر شفیق احمد، صفحہ: ۱۰۶-۱۰۷

مزید مطالعہ فرمائیے

بانگِ درا 163: طلوعِ اسلام

بانگِ درا 49: التجائے مسافر

بانگِ درا 128: فاطمہ بنت عبداللہ

ضربِ کلیم 30: ہندی اسلام

ضربِ کلیم 26: سُلطانی

بالِ جبریل 124: مسجدِ قرطبہ