ضربِ کلیم 47: اے روحِ محمد ﷺ

شِیرازہ ہُوا ملّتِ مرحوم کا ابتر
اب تُو ہی بتا، تیرا مسلمان کِدھر جائے!

تشریح:

حضرت علامہ اقبال حضور سرورِ کائنات ﷺ کی روحِ مقدّسہ سے فریاد کرتے ہیں کہ اے تاجدارِ مدینہ ﷺ! آپ ﷺ کی مِلّت، جو کبھی زندہ و تابندہ تھی، آج اُس کا شیرازہ بالکُل بکھر چُکا ہے، مسلم قوم مختلف فرقوں میں تقسیم ہو کر منتشر ہو چُکی ہے اور اُس میں ہر قسم کا نظم و ربط ختم ہو چُکا ہے۔ ایسے میں آپ ﷺ ہی فرمائیں کہ آپ ﷺ کا اُمّتی، آپ ﷺ کا مسلمان کیا صورت اختیار کرے، کِدھر جائے۔

وہ لذّتِ آشوب نہیں بحرِ عرَب میں
پوشیدہ جو ہے مجھ میں، وہ طوفان کِدھر جائے

تشریح:

یا رسول اللہ ﷺ! ہندی مسلمانوں سے تو کیا شکایت ہے، حقیقت تو یہ ہے کہ اہلِ عرب بھی اب مسلمان نہیں رہے۔ اُن کے سمندر میں بھی کوئی شورش اور طوفان نہیں ہے۔ یہ عرب قوم کہ جو کل تک ساری دُنیا پر چھائی ہوئی تھی، آج مُردہ و افسردہ ہ اور لذّتِ شورش سے بالکل محروم ہے۔ مسلمانوں میں دینِ اسلام کے لیے سرفروشی کا مادہ بالکل بھی باقی نہیں رہا۔ اب جب صورتِ حال یہ ہے تو میرے سینے میں جو طوفان بھرے جذبات ہیں، وہ میں ان تک کیوں پہنچاؤں اور جو کُچھ میرے سینے میں امانت ہے وہ کس کے سامنے کھول کر رکھوں اور اِس امانت کا اہل کون ہے؟ جب کہ صورتِ حال تو یہ ہے کہ وہ (اہلِ عرب) تو اس حد تک بے شور ہو چُکے ہیں، اُن کے دِل اُن پاکیزہ جذبات سے اس قدر خالی ہو چُکے ہیں کہ میرا طوفان بھی اُن میں کوئی حرکت پیدا نہیں کر سکے گا۔

ہر چند ہے بے قافلہ و راحلہ و زاد
اس کوہ و بیاباں سے حُدی خوان کِدھر جائے

تشریح:

عرب کے پہاڑوں اور جنگلوں میں جو عرب ہیں، وہ بے قافلہ ہیں، نہ اُن کے پاس سواریاں ہیں اور نہ ہی سامانِ سفر۔ مراد یہ کہ عرب بالکل مفلس، بے آواز اور بے کار ہو کر رہ گئے ہیں۔ نہ اُن پاس دولت ہے، نہ تجارت ہے، نہ علم ہے، نہ ہی اُن کے پاس کسی قسم کی مادی طاقت ہے اور نہ روحانی قوّت ہے۔ اُن میں سے حُدی خوان (قافلوں کے آگے گانے والے) بھی غائب ہو گئے یعنی اُن کو دوبارہ زندہ قوم بنانے کے لیے اُن میں کوئی راہبر بھی نظر نہیں آتا۔ اگر حُدی خوان سے مراد خود اقبالؔ اور حُدی سے مراد اُن کی شاعری لی جائے، تو پھر یہ معنی ہوں گے کہ قافلہ والے کہیں ہوں تو اُن کو اپنی شاعری کے ذریعے جگاؤں، جب قافلے والے ہی تتر بتر ہو چُکے ہیں تو اُن کو کیسے جگاؤں۔

اس راز کو اب فاش کر اے رُوحِ محمدؐ
آیاتِ الہیٰ کا نگہبان کِدھر جائے!

تشریح:

یا رسول اللہ ﷺ! اب وقت آ گیا ہے کہ آپ ﷺ اِس نافرمان اور نالائق قوم پر نگاہِ کرم فرمائیں اور اس کی دستگیری فرمائیں۔ یہ قوم لاکھ بُری سہی، لیکن آپ ﷺ کی نام لیوا ہے اور اللہ کے کلام پر عامل نہ سہی، اُس کی نگہبان تو ہے۔ آخر یہ دُنیا سے نیست و نابود تو نہیں ہو سکتی، کیونکہ آپ ﷺ کا پیغام ازلی اور ابدی ہے، پس لِلہ ان پر نگاہِ کرم فرمائیے اور دنیا میں ان کی باعزت زندگی کا کوئی انتظام فرمائیے۔

؎ کرم اے شہِؐ عَرب و عجم کہ کھڑے ہیں منتظرِ کرم
وہ گدا کہ تُو نے عطا کِیا ہے جنھیں دماغِ سکندری
(بانگِ درا: میں اور تُو)

بارگاہِ رسالت مآب ﷺ میں پیش کردہ اِس دلسوز استغاثے کی تشریح اور سلیس تفہیم کے بارے میں پروفیسر یوسف سلیم چشتی لکھتے ہیں:-

میں نے حتی المقدور اِس نظم کو سلیس انداز میں بیان کر دیا ہے لیکن اگر قارئین اُس سوز و گُداز سے لطف اندوز ہونا چاہتے ہیں، جو اِس نظم میں ہے تو پھر اس کو اقبالؔ ہی کے لفظوں میں پڑھیں۔ جو سوز و گُداز اِس مصرع میں ہے:-

؏ اب تُو ہی بتا، تیرا مُسلمان کِدھر جائے

وہ میرے لفظوں سے ہرگز پیدا نہیں ہو سکتا۔

پروفیسر یوسف سلیم چشتی، شرح ضربِ کلیم