ضربِ کلیم 27: صُوفی سے

تری نگاہ میں ہے معجزات کی دنیا
مری نگاہ میں ہے حادثات کی دنیا

تشریح:

علامہ اقبال نے اِس شعر میں اُس صوفی کو خطاب کرتے ہوئے، جو صرف کرامات کی دُنیا میں بستا ہے اور اصل دُنیا سے کنارہ کش ہے، کہا ہے کہ:-

تُو صرف کرامات کی دُنیا میں محدود ہو کر رہ گیا ہے، یعنی تُو اس خیال میں رہتا ہے کہ تُو کوئی نِت نئے کرشمے دکھائے تاکہ زیادہ سے زیادہ لوگ تیرے مرید بن جائیں اور میں اِس خیال میں متوجہ رہتا ہوں کہ دُنیائے حادثات کو کیونکر سنوارا جائے جس سے لوگ روحانیّت کی طرف بھی متوجّہ ہوں۔ تجھے لازم ہے کہ معجزات کی دُنیا سے باہر نکل کر حادثات و واقعات کی دُنیا کیا کا بھی مطالعہ کرے۔ یعنی یہ دیکھ کہ کائنات میں جس قدر حوادث رونما ہوتے ہیں، اُن کی عِلّت (وجہ / سبب) کیا ہے۔

واضح ہو کہ حوادثِ کائنات کی عِلّت دریافت کرنا، یہی تو سائنس کی بُنیاد ہے اور مسلمانوں کو دین کے ساتھ ساتھ سائنس (مثلاً طبیعات، کیمیا، علم الحیات وغیرہ) کا علم حاصل کرنا بھی ضروری ہے۔

تخیّلات کی دنیا غریب ہے، لیکن
غریب تر ہے حیات و ممات کی دنیا

تشریح:

تیرے تخیّلات یعنی کرامات کی دُنیا بیشک عجیب ہے لیکن اُس سے بھی عجیب تر دُنیا یہ زندگی اور موت کی دُنیا ہے جس سے حقیقی طور پر ہر انسان کو واسطہ پڑتا ہے۔ اِس دُنیا کو چھوڑ نا اور فقط تخیّلات کی دُنیا میں رہنا اسلامی تصوّف نہیں ہے۔ اسلامی تصوّف تو وہ ہے جس میں روحانی دُنیا کے ساتھ ساتھ اِس مادی دُنیا سے بھی رابطہ رہے۔

علم الحيٰوة (Biology) اور علم الحیوان (Zoology) کا مطالعہ انسان کے لیے جس قدر ضروری ہے، اُس سے زیادہ دلچسپ ہے۔ اِن علوم سے ہم کو یہ معلوم ہو سکتا ہے کہ اللہ نے جہاں ہاتھی جیسی بڑی چیز پیدا کی ہے، وہاں ایسے چھوٹے کیڑے بھی پیدا کیے ہیں جو خورد بین (Microscope) کے بغیر نظر بھی نہیں آ سکتے۔ علاوہ بریں یہ معلوم کرنا بھی دلچسپی سے خالی نہیں کہ جاندار مخلوقات کیسے زندہ رہتی ہیں، اور کیسے مرتی ہیں۔

واضح ہو کہ اللہ تعالی نے مظاہرِ قدرت کو بھی اپنی آیات (نشانیاں) ارشاد فرمایا ہے:-

وَسَخَّرَ لَكُمْ مَّا فِى السَّمَاوَاتِ وَمَا فِى الْاَرْضِ جَـمِيْعًا مِّنْهُ ۚ اِنَّ فِىْ ذٰلِكَ لَاٰيَاتٍ لِّـقَوْمٍ يَّتَفَكَّـرُوْنَ

ترجمہ: اور اُس نے مسخّر کر دیا تمہارے لیے اپنی طرف سے جو کُچھ آسمانوں میں اور جو کُچھ زمین میں ہے، یقیناً اس میں نشانیاں (آیات) ہیں اُن لوگوں کے لیے جو غور و فکر سے کام لیں۔
(القرآن: سورۃ الجاثیہ: آیت 13)

عجب نہیں کہ بدل دے اسے نگاہ تری
بُلا رہی ہے تجھے مُمکنات کی دنیا

تشریح:

پس اسے صوفی! تُجھے چاہیے کہ ممکنات کی دُنیا کی طرف بھی متوجہ ہو۔ جس طرح مراقبہ ضروری ہے، اُسی طرح مشاہدہ بھی تو ضروری ہے۔ مسلمانوں کو اِن دونوں کی ضرورت ہے۔ مراقبہ سے ذکر کی قوّت ترقی کرتی ہے، مشاہدہ سے فکر کی قوّت میں ترقی ہوتی ہے۔ اور اقبالؔ کہتے ہیں کہ کوئی تعجب نہیں، اگر تُو ممکنات کی دنیا میں انقلاب پیدا کر دے۔ بقول علامہ اقبال:-

؎ کوئی اندازہ کر سکتا ہے اُس کے زورِ بازو کا
نگاہِ مردِ مومن سے بدل جاتی ہیں تقدیریں
(بانگِ درا: طلوعِ اسلام)