بالِ جبریل 129: لینن (خدا کے حضور میں)

اے انفُس و آفاق میں پیدا ترے آیات
حق یہ ہے کہ ہے زندہ و پائندہ تِری ذات

تشریح:

لینن کی زبانی خیالات کے اظہار اور نظم کے ڈرامائی اسلوب کی حکمت بیان کرتے ہوئے پروفیسر یوسف سلیم چشتی لکھتے ہیں:-

چونکہ لینن کی طرح اقبالؔ خود بھی سرمایہ پرستی کے خلاف ہیں، اِس لیے اُنہوں نے اُس کی زبان سے اپنے خیال کا اِظہار کیا ہے تاکہ نظم میں ڈرامائی اسلوب پیدا ہو سکے جو اثر آفرینی کے لحاظ سے تمام اسالیب پر فوقیّت رکھتا ہے۔

پروفیسر یوسف سلیم چشتی، شرح بالِ جبریل

لینن خدا کے حضور میں عرض کرتا ہے کہ:-

اے ذاتِ کریم! تیری ہستی کے دلائل، تیری نشانیاں (آیات) انفُس اور آفاق، دونوں میں موجود ہیں۔ حق یہ ہے کہ تُو ہی حیُّ اور قیُّوم ہے۔ تیری ہی ذات ہمیشہ زندہ اور قائم رہنے والی ہے۔

اِس مصرع کا مضمون قرآنِ حکیم کی تعلیم سے ماخوذ ہے یعنی اللہ کی ہستی کے دلائل کائنات میں بھی موجود ہیں اور خود اِنساںوں کے اندر بھی، بشرطیکہ وہ غور و فِکر سے کام لیں۔

وَفِى الْاَرْضِ اٰيَاتٌ لِّلْمُوْقِنِيْنَ (20) وَفِىٓ اَنْفُسِكُمْ ۚ اَفَلَا تُبْصِرُوْنَ (21)

ترجمہ: اور یقین کرنے والوں کے لیے کائنات میں (بھی ہماری ہستی) کے دلائل موجود ہیں اور خود تمہارے نفسوں میں بھی۔ پس کا تُم غور نہیں کرتے؟
(القرآن: سورۃ الذاریات: آیت 20 تا 21)

میں کیسے سمجھتا کہ تو ہے یا کہ نہیں ہے
ہر دم متغّیر تھے خرد کے نظریّات

تشریح:

اے خُدا! چونکہ میں ایک مادہ پرست تھا اور صرف عقلی دلائل پر اعتماد کرتا تھا اور عقلی دلائل کا کوئی اعتبار نہیں۔ آج ایک بات عقل کی رو سے صحیح ثابت ہوتی ہے کل وہی بات اُسی عقل کی رو سے غلط ثابت ہو جاتی ہے۔ اس لیے میں یہ فیصلہ نہ کر سکا کہ تُو ہے یا نہیں ہے۔

اگر اِن نظریات میں سے کوئی ایک نظریہ اپنی جگہ قائم رہتا تو مجھے یقین ہو جاتا کہ وہ نظریہ سچّا ہے، گویا اگر مجھے تیری ہستی کا یقین نہ آیا اور میں تجھ پر ایمان نہ لا سکا تو اِس کی وجہ فلسفیوں کے وہ نظریّات ہیں، جن کے بدلتے رہنے سے میں بدظَن ہو گیا۔ یہی وجہ ہے کہ میں ساری زندگی تیرے وجود کے بارے میں بھی بے یقینی کا شکار رہا اور کوئی واضح شکل سامنے نہ آ سکی۔

محرم نہیں فطرت کے سرودِ اَزلی سے
بِینائے کواکب ہو کہ دانائے نباتات

تشریح:

موجودہ زمانے میں عَلْمِ ہَیئَت و نجوم (Astronomy and Astrology) کے ماہر ہوں یا ماہرینِ فطرت (Naturalists)! وہ خود بھی حقیقت کا صحیح ادراک نہیں رکھتے۔ اول الذکر تو ستاروں کی گردش پر اکتفا کرتے ہیں اور دوسرے آئے دن نئی نئی باتیں سُناتے ہیں لیکن دیکھا جائے تو اُن کو فطرت کے مظاہر سے کوئی آگاہی نہیں۔ یہی وجہ ہے کہ فطرت کی ازلی صدا سے واقف نہ ہو سکے، خود بھی تیری ذات کے عرفان سے محروم رہے اور دوسروں کو بھی محروم رکھا۔

آج آنکھ نے دیکھا تو وہ عالم ہُوا ثابت
میں جس کو سمجھتا تھا کلیسا کے خرافات

تشریح:

یہ درست ہے کہ میں تو مادہ پرست تھا اس لیے مرنے کے بعد دوبارہ کی زندگی کا قائل ہی نہ تھا اور جب تک زندہ رہا، اُس وقت تک عالمِ آخرت کو پادریوں کی افسانہ سازیاں سمجھتا رہا، لیکن اب جب کہ میں تیرے حضور میں حاضر ہوں اور تجھے اپنی آنکھوں سے دیکھ رہا ہوں تو کس طرح تیرا انکار کر سکتا ہوں۔

ہم بندِ شب و روز میں جکڑے ہُوئے بندے
تُو خالقِ اعصار و نگارندۂ آنات!

تشریح:

یا اِلہی! آج معلوم ہوتا ہے کہ ہم لوگ تو زمان و مکان کی زنجیروں میں جکڑے ہوئے بے بس انسان ہیں، جبکہ تُو اے باری تعالیٰ! زمانوں کا خالق اور ایک ایک لمحے کی واردات کو محفوظ رکھنے والا ہے۔

اک بات اگر مجھ کو اجازت ہو تو پُوچھوں
حل کر نہ سکے جس کو حکیموں کے مقالات

تشریح:

تاہم اگر مجھے اجازت ہو اور تُو میری اِس جسارت سے درگُزر کرے تو ایک بات پوچھنا چاہتا ہوں، یہ ایسی بات ہے کہ جسے دُنیا کے بڑے بڑے فلسفیوں نے حل کرنا چاہا، اُنہوں نے مقالات لِکھ لِکھ کر اپنی عمریں صرف کر دیں، لیکن حل نہ کرسکے۔

جب تک میں جِیا خیمۂ افلاک کے نیچے
کانٹے کی طرح دل میں کھٹکتی رہی یہ بات

تشریح:

جب تک میں آسمان کے خیمے کے نیچے یعنی روئے زمیں پر زندہ رہا، تب تک میرے دِل میں کانٹے کی طرح یہ بات کھٹکتی رہی اور کوئی شخص میرے سوال کا جواب نہ دے سکا کہ جس سے میری تسلّی ہو جاتی۔

گفتار کے اسلوب پہ قابُو نہیں رہتا
جب رُوح کے اندر متلاطم ہوں خیالات

تشریح:

چونکہ میرے دِل میں خیالات اور جذبات کا ہجوم ہے اور ایسی حالت میں تُو خود جانتا ہے کہ آدمی گفتار کے اسلوب پر قابو نہیں رکھ سکتا یعنی اُس کی گفتگو میں کہیں کہیں گُستاخی یا بیباکی کا رنگ پیدا ہو جاتا ہے۔ اِس لیے میری گُفتگو بھی حدِّ ادب سے اگر متجاوز ہو جائے تو یا الہی! در گُزر فرمانا۔

وہ کون سا آدم ہے کہ تُو جس کا ہے معبود
وہ آدمِ خاکی کہ جو ہے زیرِ سماوات؟

تشریح:

اے خدا! میں بڑے ادب سے یہ دریافت کرنا چاہتا ہوں کہ تُو کس آدم کا خدا یا معبود ہے؟ اس سوال کی وجہ یہ ہے کہ دُنیا کے علاوہ بنی آدم اور کسی کُرّہ پر نہیں ہیں اور دُنیا میں جو لوگ بستے ہیں وہ تجھے اپنا معبود سمجھتے نہیں تو پھر قدرتی طور پر میرے دِل میں یہ سوال پیدا ہوا کہ ”؏ وہ کون سا آدم ہے کہ تُو جس کا ہے معبود؟“

مشرق کے خداوند سفیدانِ فرنگی
مغرب کے خداوند درخشندہ فِلِزّات

تشریح:

اُس آدمی کی کیا حالت ہے؟ میں نے خوب غور کر کے دیکھا ہے کہ کوئی شخص تیری پرستِش نہیں کرتا۔ جو لوگ مشرق میں بستے ہیں، اُن کے خداوند یورپ کے سفید فام باشندے بنے ہوئے ہیں، اس لیے اہلِ یورپ نے پورے مشرق پر قبضہ جما رکھا ہے اور خود یورپ والوں نے چمکنے والی دھاتوں کو اپنا خدا بنا لیا ہے اور مادیت پرستی میں مبتلا ہو کر مشینوں ہی کو اپنا سب کچھ سمجھ رکھا ہے۔ وہ رات دِن انہیں کی پرستش میں لگے رہتے ہیں۔ پھر اے باری تعالیٰ تیری پرستش کرنے والا کون ہوا؟

یورپ میں بہت روشنیِ علم و ہُنر ہے
حق یہ ہے کہ بے چشمۂ حیواں ہے یہ ظُلمات

تشریح:

اے خدا! اِس میں شک نہیں کہ یورپ میں سائنس اور فلسفہ بہت ترقی پذیر ہے اور اپنے علوم و فنون کی بدولت اِس خطہ کے لوگ ساری دُنیا پر حکومت کر رہے ہیں لیکن حقیقت یہ ہے کہ یہ بحرِ ظلمات (ظلمت یعنی تاریکی) چشمۂ حیواں سے محروم ہے۔ یعنی اِس تمام علم و ہنر کے باوجود یورپ انسان کو اُس کی زندگی کی حقیقی معنویت و مقصد سے آشنا کرنے میں ناکام ہے۔

چشمۂ حیواں اور ظلمات کا تعلق اُس عام ادبی روایت سے ظاہر ہے جس کا خلاصہ یہ ہے کہ ایک مفروضہ چشمہ ہے، جس کا پانی پی لیا جائے تو انسان کو دائمی زندگی حاصل ہو جاتی ہے۔ اس تک پہنچنے کے لیے سخت اندھیرے میں گزرنا پڑتا ہے۔ مشہور ہے کہ سکندر حضرت خضرؑ کو رہنما بنا کر اِس چشمہ کی تلاش میں نکلا تھا۔ حضرت خضرؑ نے اس کا پانی پی لیا، سکندر اس سے محروم رہا۔

رعنائیِ تعمیر میں، رونق میں، صفا میں
گِرجوں سے کہیں بڑھ کے ہیں بنکوں کی عمارات

تشریح:

عمارات کی شان و شوکت، رونق اور صفائی کے لحاظ سے دیکھا جائے تو یورپ کے گرجوں سے وہاں کے بنکوں کی عمارتیں بہت بڑھی چڑھی ہیں۔ اِس سے اندازہ ہو سکتا ہے کہ اہل یورپ کو اپنی دولت اور سُودی تجارتی کاروبار سے جو دِلچسپی ہے، وہ مذہب سے نہیں۔

ظاہر میں تجارت ہے، حقیقت میں جُوا ہے
سُود ایک کا لاکھوں کے لیے مرگِ مفاجات

تشریح:

اِن بنکوں کا سارا کاروبار بظاہر تجارت کے نام سے چل رہا ہے لیکن اس کی حقیقی صورت جُوئے کی ہے۔ یہ نظام چند افراد کے لیے تو واقعی مُفید ہے لیکن لاکھوں انسانوں کے لیے مرگِ ناگہاں کا پیغام ہے۔

یہ عِلم، یہ حِکمت، یہ تدبُّر، یہ حکومت
پیتے ہیں لہُو، دیتے ہیں تعلیمِ مساوات

تشریح:

اہلِ یورپ بظاہر دُنیا کو مساوات کا درس دیتے ہیں اور ظاہر یہ کرتے ہیں کہ وہ سب کو برابر سمجھتے ہیں، ان میں ذات پات اور اونچ نیچ کی کوئی قید نہیں لیکن ان کا حال دیکھا جائے تو وہ اپنے علم و فلسفہ اور حکمت و سلطنت کے ذریعہ سے محکوموں کا خون چُوستے ہیں۔

بے کاری و عُریانی و مے خواری و اِفلاس
کیا کم ہیں فرنگی مَدنِیّت کے فتوحات

تشریح:

اور جس تہذیب پر اُنہیں ناز ہے اُس کے نتائج اِس کے سِوا اور کُچھ نہیں نکلے کہ جہاں جہاں اہلِ یورپ کا تمدن پہنچا، وہاں بہت بُرے نتائج سامنے آئے۔ بیکاری بڑھ گئی، لوگوں کے لیے تن پوشی کا سامان نہ رہا، شراب نوشی کی لعنت عام ہو گئی، مفلسی ترقی کر گئی، اس کے سوا اہلِ یورپ نے خلقِ خدا کی کیا خدمت انجام دی ہے؟

وہ قوم کہ فیضانِ سماوی سے ہو محروم
حد اُس کے کمالات کی ہے برق و بخارات

تشریح:

جو قوم آسمانی فیض سے محروم ہو، جس کے پیشِ نظر کوئی الہامی کتاب نہ ہو اور وہ خدا کے بھیجے ہوئے کسی پیغمبر کی تعلیم پر عمل پیرا نہ ہو، اُس کے کمالات بجلی اور بھاپ سے اوپر کیوں کر جا سکتے ہیں اور انسانوں کو در پیش مسائل کا حقیقی حل کیونکر پیش کر سکتے ہیں؟ آدم کو ثبات اور دستُورِ حیات کہاں سے عطا کر سکتے ہیں، کیونکہ اُنہوں نے تو مادیت پرستی میں مُبتلا ہو کر خود کو فیضانِ سماوی سے محروم کر رکھا ہے۔

ہے دل کے لیے موت مشینوں کی حکومت
احساسِ مروّت کو کُچل دیتے ہیں آلات

تشریح:

آج صورت یہ ہے کہ مشینیں ہر جگہ لگ گئی ہیں۔ انہیں کے ذریعہ سے صنعت و حرفت کا کام ہوتا ہے۔ یہی بے حس فولادی چیزیں اہلِ یورپ کی ترقی کا وسیلہ ہیں۔ نتیجہ یہ نکلا کہ انسانی ہمدردی کے لیے بڑھنے اور پلنے کا کوئی موقع نہ رہا۔ مروّت اور احسان کے احساسات کُچلے گئے اور دِل مُردہ ہوگئے۔

سچ ہے کہ انسان جس ماحول میں رات دِن رہے، اُسی کے رنگ میں رنگا جاتا ہے۔ جب انسان کے بڑے بڑے گروہ مل جُل کر کام کرتے تھے، تو اُن میں ایک دوسرے سے ربط و تعلق کی بنا پر ہمدردی کے جذبات ابھرتے تھے، وہ ایک دوسرے کی خدمت کے لیے ہر وقت تیار رہتے تھے۔ جب مشینوں کا زمانہ آگیا تو کارکنوں کے دل بھی لوہے کی طرح سخت ہوگئے۔ ان میں تو تھوڑی بہت ہمدردی ممکن ہے باقی ہو، لیکن کارخانہ دار اس سے بالکل عاری ہو گئے۔ ان کا نصب العین یہ بن گیا کہ جتنا روپیہ ہو سکے، کمائیں اور مزدوروں یا کارکنوں کی امداد یا ان کی محنت و مشقت کا کوئی خیال نہ کریں۔ اقبالؔ کے نزدیک یہ بے حسی نتیجہ ہے مشینوں اور فولادی اوزاروں سے کام لینے کا۔

آثار تو کچھ کچھ نظر آتے ہیں کہ آخر
تدبیر کو تقدیر کے شاطر نے کیا مات

تشریح:

اب آکر ایسے آثار نمایاں ہوئے ہیں، جن سے ظاہر ہوتا ہے کہ تقدیر نے تدبیر کو مات دے دی؛ مطلب یہ کہ سرمایہ داروں اور سرمایہ پرستوں نے اپنی تدبیروں سے دولت جمع کرنے کا عجیب نظام تیار کر لیا ہے۔ مزدور اور کارکن مصیبتوں میں مُبتلا تھے اور سرمایہ دار بے فکر ہو کر مزے اُڑاتے تھے۔ آہستہ آہستہ مزدوروں میں بھی اپنے حقوق کے لیے جد و جہد کا احساس پیدا ہوا۔ وہ بھی یونین بنا کر سرمایہ داروں کے خلاف ہنگامے بپا کرنے لگے۔

یہ حقیقت میں اس قدرت کی طرف سے تنبیہ کا تازیانہ تھا۔ اس کا مطلب یہ تھا کہ خودغرض انسانوں کی تدبیریں خدائی قانون کی زد سے زیادہ دیر تک محفوظ نہیں رہ سکتیں اور صاف نظر آرہا ہے کہ اللہ تعالیٰ مقرر کردہ تقدیر کے سامنے تدبیر شِکست کھا رہی ہے۔

؎ سامنے تقدیر کے رُسوائیِ تدبیر دیکھ
(بانگِ درا: خضرِ راہ)

میخانے کی بُنیاد میں آیا ہے تزَلزُل
بیٹھے ہیں اسی فکر میں پِیرانِ خرابات

تشریح:

چونکہ محنت کش طبقہ کے اندر یہ احساس پیدا ہو گیا ہے کہ سرمایہ دار اُن کا لہو پی رہے ہیں، اس لیے وہ سب ایک زلزلے کی صورت میں اپنے حقوق کے لیے اُٹھ کھڑے ہوئے ہیں اور اس میخانے، اِس عیش و عشرت پر مبنی نظامِ سرمایہ داری کی بُنیادیں ہلا ڈالی ہیں۔ یہی وجہ ہے کہ اس نظامِ سرمایہ داری کے بڑے بڑے منتظم رات دِن فکر میں سر گرداں ہیں کہ اس مصیبت کو کیوں کر ٹالیں اور یہ جو انقلاب برپا ہونے جا رہا ہے، اس کی روک تھام کس طرح سے کریں۔

چہروں پہ جو سُرخی نظر آتی ہے سرِ شام
یا غازہ ہے یا ساغر و مِینا کی کرامات

تشریح:

اس مشینی اور استعماری نظام نے جہاں دوسروں کو متاثر کیا ہے وہاں خود اس نظام کے مدعی اہلِ یورپ کی صحبتیں برباد ہو چکی ہیں۔ سرِ شام جب وہ گھر سے بن ٹھن کر بر آمد ہوتے ہیں تو اُن کے چہروں کی سُرخی فطری نہیں بلکہ اس امر کی غماز ہوتی ہے کہ یا تو ان کے چہروں پر شراب نوشی یا پھر مختلف نوعیت کے پاؤڈر کے استعمال کے سبب سُرخ ہیں۔ مراد یہ ہے کہ مصنوعی زندگی نے ان کی صحتوں کو دیمک کی طرح چاٹ لیا ہے اور اب جو چہروں پر سرخی نظر آتی ہے وہ فطری نہیں بلکہ مصنوعی ہے۔

یعنی اگر مغربی باشندوں کو دیکھ کر آپ کو یہ خیال گزرے کہ وہ بہت پر خوش ہیں اور پُر سکُون زندگی بسر کر رہے ہیں، اور اپنے نظام سے بہت متفق نظر آتے ہیں، تو یہ سراسر آپ کا وہم ہے، کیونکہ اصل صورتِ حال اس کے بالکل برعکس ہے۔

تُو قادر و عادل ہے مگر تیرے جہاں میں
ہیں تلخ بہت بندۂ مزدور کے اوقات

تشریح:

اے مالک! بیشک تجھے کائنات کی ہر شے پر قدرت حاصل ہے اور تُو عادل و منصف بھی ہے، لیکن تیری دُنیا میں مزدور اور محنت کش طبقہ بڑی تلخیوں سے دوچار ہے۔

کب ڈُوبے گا سرمایہ پرستی کا سفینہ؟
دُنیا ہے تری منتظرِ روزِ مکافات!

تشریح:

اے ذاتِ کریم! یہ واضح فرما دے کہ سرمایہ پرستی کی کشتی کب ڈوبے گی؟ اے باری تعالیٰ! تیری دُنیا بدلے کے دِن کا انتظار کر رہی ہے۔ مولا! استعماری نظام ظلم کی انتہا کو پہنچ چکا ہے۔ بے شک ظالم کی رسی ایک مُدت تک دراز ضرور ہوتی ہے، لیکن بالآخر ایک مرحلہ ایسا آتا ہے جب اُسے اُس کا بدلہ دیا جاتا ہے۔ پھر کیا وجہ ہے کہ سرمایہ پرستی کی برائیوں کا بدلہ ابھی تک نہیں ملا؟ دُنیا والے منتظر ہیں کہ ظلم و ستم کا حساب چُکایا جائے، مزدور اپنی محنت کا صِلہ پائیں اور اُنہیں اطمینان نصیب ہو۔ آخر تُو ہی نے تو یہ قاعدہ مقرر کر رکھا ہے کہ برائی کا بدلہ برائی کے سِوا کچھ نہیں۔

مَنْ يَّعْمَلْ سُوٓءًا يُّجْزَ بِهٖۙ

ترجمہ: جو کوئی برائی کرے گا، اُس کی سزا پائے گا۔
(القرآن: سورۃ النساء: آیت 123)