بانگِ درا 84: فراق

تلاشِ گوشۂ عُزلت میں پھر رہا ہُوں مَیں
یہاں پہاڑ کے دامن میں آ چھُپا ہوں مَیں

تشریح:

محبوب کی جدائی نے مجھے سرگرداں بنا دیا ہے اور دُنیا کی دلچسپیوں سے بیزار ہو گیا ہوں۔ میری بے چینی اور اضطراب کا یہ عالم ہے کہ ایسے مقام کی تلاش میں مارا مارا پھر رہا ہوں جہاں تنہائی میسر آسکے۔ چنانچہ اسی تلاش کے سبب پہاڑ کے دامن میں گوشہ گیر ہو گیا ہوں۔

شکستہ گیت میں چشموں کے دلبری ہے کمال
دُعائے طفلکِ گفتار آزما کی مثال

تشریح:

یہاں پہاڑی چشموں کی آوازوں میں، جو وقفوں کے بعد پیدا ہوتی ہیں، بڑی دِلکشی پائی جاتی ہے۔ ایسا معلوم ہوتا ہے کہ جیسے کوئی بچہ اپنے ٹوٹے پھوٹے لفظوں میں دُعا مانگ رہا ہے (چھوٹے بچے کی توتلی زبان بہت دلکش ہوتی ہے اور اُس کے پاس بیٹھے ہوؤں کے دل موہ لیتی ہے)۔

ہے تختِ لعلِ شفَق پر جلوسِ اخترِ شام
بہشتِ دیدۂ بینا ہے حُسنِ منظرِ شام

تشریح:

شام کا وقت ہے اور غروبِ آفتاب کے سبب جو شفق (طلوع اور غروبِ آفتاب کے وقت آسمان پر پھیلنے والی سُرخی) پھُوٹی ہے اس کے پس منظر میں شام کا ستارہ اپنی پناہ گاہ سے برآمد ہو رہا ہے۔ میں دیکھ رہا ہوں کہ یہ خوبصورت منطر بہِشت کے مناظر کی طرح حُسن و جمال سے ہم آہنگ ہے۔

سکُوتِ شامِ جُدائی ہُوا بہانہ مجھے
کسی کی یاد نے سِکھلا دیا ترانہ مجھے

تشریح:

ہجر اور فرقت کی شام کی خاموشی میرے لیے بہانہ ثابت ہوئی اور محبوب کی یاد نے مجھے نغمے گانے پر مائل کر دیا۔

یہ کیفیت ہے مری جانِ ناشکیبا کی
مری مثال ہے طفلِ صغیرِ تنہا کی

تشریح:

میری بے قرار جان کی حالت و کیفیت ایک ننھے مُنے بچے کی سی ہے جو تنہا بیٹھا ہو۔ اُس بچے پر عجب کیفیت طاری ہوتی ہے۔ کبھی وہ رونے لگتا ہے اور کبھی خود ہی خاموش ہو جاتا یا مسکرانے لگتا ہے (شاعر کا خود کو ایک بچے سے تشبیہ دینا اُس کی معصومیت کی طرف بھی اشارہ کرتا ہے)۔

اندھیری رات میں کرتا ہے وہ سرود آغاز
صدا کو اپنی سمجھتا ہے غیر کی آواز

تشریح:

وہ ننھا بچہ اندھیری رات میں گیت کا آغاز کرتا ہے‘ یعنی اپنی پیاری زبان بولنے لگتا ہے اور اپنی آواز کو اپنی آواز سمجھنے کی بجائے کسی دوسرے کی آواز سمجھتا ہے اور اس طرح اپنے آپ کو فریب میں مبتلا کر دیتا ہے کہ اُس کا کوئی غمگُسار اُس کے پاس موجود ہے جو اُسے لوری دے رہا ہے یا دِل بہلا رہا ہے۔

یونہی میں دل کو پیامِ شکیب دیتا ہوں
شبِ فراق کو گویا فریب دیتا ہوں

تشریح:

میں بھی اُس چھوٹے بچے کی طرح اپنے دل کو مطمئن کرنے کی کوشش کر رہا ہوں اور یوں نغمے گا گا کر اپنی شبِ فراق کو فریب دینے کی کوشش میں مصروف ہوں۔ گویا عاشق اور شبِ ہجر میں صبر و قرار سے رہے؟ یہ ناممکن ہے۔ لہذا دل کو مذکورہ پیام دینا شبِ فراق کو فریب دینے کی مانند ہے۔

محبوب سے جدائی اور فراق کی گھڑیاں ایک عاشق کے لیے اس قدر کرب آمیز ہوتی ہیں کہ تمام ہنگامہ ہاؤ کو ترک کر کے کوئی ایسا گوشۂ تنہائی تلاش کرتا ہے جہاں فراق کے اس کرب سے نجات حاصل ہو سکے۔ وہاں وہ اپنی دھُن میں اسی طرح ہجر و فراق کے نغمے گا کر خود کو اس طرح سے فریب دیتا ہے جیسے ننھا بچہ اپنی غوں غاں کو دوسروں کی آواز جان کر خوش ہوتا ہے

نسیم امروہوی فرہنگِ اقبالؔ میں لکھتے ہیں کہ اِس نظم میں وہی کیفیت ہے جو مومنؔ کے درج ذیل شعر میں ہے:-

؎ تم میرے پاس ہوتے ہو گویا
جب کوئی دوسرا نہیں ہوتا