بانگِ درا 79: انسان

قُدرت کا عجیب یہ ستم ہے!
انسان کو راز جُو بنایا
راز اُس کی نگاہ سے چھُپایا

تشریح:

اقبالؔ فرماتے ہیں کہ قدرت (اللہ تعالی) کی کارفرمائی انسان کی سمجھ سے بالاتر ہے۔ ایک طرف تو اُس نے انسان کو راز جُو (تلاش کرنے والا) بنایا یعنی انسان کے اندر تحقیق اور جستجو کا مادہ رکھ دیا اور اسی کی وجہ سے وہ اپنی اور کائنات کی حقیقت سے آگاہ ہونا چاہتا ہے، دوسری طرف کائنات کے تمام اسرار کو بھی پردۂ غیب میں رکھ کر اُس کی آنکھوں سے چھُپا دیا۔

بے تاب ہے ذوق آگہی کا
کھُلتا نہیں بھید زندگی کا

تشریح:

انسان شروع دِن ہی سے کائنات کے بھیدوں کو جاننے کے لیے بے چین ہے۔ اُس کے دِل و دماغ میں اشیاء کو جاننے کا یہ شوق اُسے مضطرب و بے قرار کیے رکھتا ہے لیکن اِس اضطراب و بے چینی کے باوجود اُس پر زندگی کا راز منکشف (ظاہر) نہیں ہوتا۔

یہ آگہی مری مجھے رکھتی ہے بے قرار
خوابیدہ اس شرر میں ہیں آتش کدے ہزار
یہ امتیازِ رفعت و پستی اسی سے ہے
گُل میں مہک، شراب میں مستی اسی سے ہے
بستان و بُلبل و گُل و بُو ہے یہ آگہی
اصلِ کشاکشِ من و تُو ہے یہ آگہی
(بانگِ درا: شمع)

حیرت آغاز و انتہا ہے
آئینے کے گھر میں اور کیا ہے

تشریح:

انسان کو اپنی سعی اور کوشش کی ابتدا اور انجام پر صرف حیرت سے دوچار ہونا پڑتا ہے اور کیوں نہ ہو! شیشے کے گھر میں اِس کے علاوہ اور مِل بھی کیا سکتا ہے۔ شیشے کا گھر وہ ہے جس میں وہی کچھ نظر آتا ہے جو اُس کے سامنے ہو! یہی وجہ ہے کہ کائنات کے تمام راز انسان کی حیرانی کا سبب ہیں۔

اِقبالؔ نے اس کائنات کو شیشے کا گھر قرار دیا کہ آئینہ بھی حیران رہتا اور حیران کر دیتا ہے اور کائنات کے مظاہر، جو قدرت کے آئینہ دار ہیں انسان کو حیرت میں ڈالے رکھتے ہیں۔

علامہ نے تو زندگی سے متعلق بڑے وسیع معنوں میں بات کی ہے لیکن پنڈت چکبست نرائن نے مختصراً اور ظاہری طور پر زندگی کی حقیقت یوں بیان کی ہے:-

؎ زندگی کیا ہے، عناصر میں ظہورِ ترتیب
موت کیا ہے، اِنہیں اجزا کا پریشاں ہوا

حیرت آغاز و انتہا ہے: فلسفہ کی ابتدا بھی حیرت سے ہوتی ہے اور انتہا بھی حیرت پر ہوتی ہے۔ یہ افلاطونؔ کا مشہور قول ہے جو فلسفہ کے ہر طالب علم کو معلوم ہے۔ چنانچہ پروفیسر میورہیڈ (Muirhead) نے اپنی کتاب علم الاخلاق (The Elements of Ethics) اِسی ترجمہ سے شروع کی ہے۔

ہے گرمِ خرام موجِ دریا
دریا سوئے بحر جادہ پیما

تشریح:

اِنسان دیکھتا ہے کہ دریا کی لہریں تیزی سے سفر کر رہی ہیں (گرمِ خرام: ایک انداز سے چلنا)، جبکہ دریا ہمہ وقت سمندر کی طرف جانے والے راستے پر سفر کر رہا ہے (جادہ پیما: مسافر / راستہ چلنے والا) یعنی سمندر کی طرف بہا چلا جارہا ہے۔

بادل کو ہوا اُڑا رہی ہے
شانوں پہ اُٹھائے لا رہی ہے

تشریح:

بادلوں کو دیکھیے تو ہوا اُنہیں آسمان کی وسعتوں میں اُڑائے لے جارہی ہے، یوں معلوم ہوتا ہے جیسے بادل ہوا کے کندھوں پر سوار ہوں۔ خود بادل حیرانی کا باعث ہیں، اس پر ہوا کا اُنہیں مختلف اطراف میں اُڑائے پھِرنا اور بھی حیرانی کا باعث ہے۔

تارے مستِ شرابِ تقدیر
زندانِ فلک میں پا بہ زنجیر

تشریح:

ستارے تقدیر کی شراب کے نشے میں سرمست ہیں، ایسا معلوم ہوتا ہے جیسے اُن کے پیروں میں زنجیریں پڑی ہوئی ہیں اور وہ آسمان کے قید خانہ (زندانِ فلک) کے قیدی ہیں۔ یعنی اللہ تعالی نے ستاروں کے لیے جو اندازہ یا پیمانہ (تقدیر؛ قدر) مقرر کیا ہوا ہے، وہ اُس کے پابند ہیں اور اپنے مقررہ راستوں سے ہٹ نہیں سکتے۔ یہ منظر بھی انسان کے لیے حیرت کا باعث ہے۔

ذرّہ ذرّہ دہر کا زندانیِ تقدیر ہے
پردۂ مجبوری و بےچارگی تدبیر ہے
آسماں مجبور ہے، شمس و قمر مجبور ہیں
انجمِ سیماب پا رفتار پر مجبور ہیں
(بانگِ درا: والدہ مرحومہ کی یاد میں)

قرآن پاک میں اللہ تعالی فرماتے ہیں:-

اَللّـٰهُ الَّـذِىْ رَفَـعَ السَّمَاوَاتِ بِغَيْـرِ عَمَدٍ تَـرَوْنَـهَا ۖ ثُـمَّ اسْتَوٰى عَلَى الْعَرْشِ ۖ وَسَخَّرَ الشَّمْسَ وَالْقَمَرَ ۖ كُلٌّ يَّجْرِىْ لِاَجَلٍ مُّسَمًّى ۚ يُدَبِّـرُ الْاَمْرَ يُفَصِّلُ الْاٰيَاتِ لَعَلَّكُمْ بِلِقَـآءِ رَبِّكُمْ تُوقِنُـوْنَ (2)

ترجمہ: اور اللہ وہ ہے جس نے آسمانوں کو بغیر ستون کے (خلا میں) بلند فرمایا (جیسا کہ) تم دیکھ رہے ہو، پھر (پوری کائنات پر محیط اپنے) تختِ اقتدار پر متمکن ہوا اور اس نے سورج اور چاند کو نظام کا پابند بنا دیا، ہر ایک اپنی مقررہ میعاد (میں مسافت مکمل کرنے) کے لیے (اپنے اپنے مدار میں) چلتا ہے۔ وہی (ساری کائنات کے) پورے نظام کی تدبیر فرماتا ہے، (سب) نشانیوں (یا قوانینِ فطرت) کو تفصیلاً واضح فرماتا ہے تاکہ تم اپنے رب کے روبرو حاضر ہونے کا یقین کر لو۔
(القرآن: سورۃ الرعد: 2)

ایک اور جگہ فرماتے ہیں :-

لَا الشَّمْسُ يَنْـبَغِىْ لَـهَآ اَنْ تُدْرِكَ الْقَمَرَ وَلَا اللَّيْلُ سَابِقُ النَّـهَارِ ۚ وَكُلٌّ فِىْ فَلَكٍ يَّسْبَحُوْنَ (40)

ترجمہ: نہ سورج کے بس میں یہ ہے کہ وہ چاند کو جا پکڑے اور نہ رات دن پر سبقت لے جا سکتی ہے سب ایک ایک فلک میں تیر رہے ہیں۔
(القرآن: سورۃ یس: 40)

خورشید، وہ عابدِ سحَر خیز
لانے والا پیامِ ’برخیز‘

تشریح:

سورج (خورشید) ایک صبح سویرے اُٹھنے والے عبادت گزار (عابدِ سحر خیز) کی طرح طلوع ہوتا ہے اور تمام عالمِ موجودات کے لیے اُٹھنے اور اپنے اپنے کام میں مصروفِ کار ہونے کا پیغام (برخیز) لاتا ہے۔

مغرب کی پہاڑیوں میں چھُپ کر
پیتا ہے مئے شفَق کا ساغر

تشریح:

وہ (سورج) جب شام کو مغرب کی سِمت میں غروب ہوتا ہے تو یوں معلوم ہوتا ہے جیسے وہ مغرب کی پہاڑیوں میں چھُپ کر شفق کی شراب (مئے شفق) کا پیالہ (ساغر) پی رہا ہو۔ قدرت کے یہ کیسے مظاہر ہیں جنہیں دیکھ کر انسان پر حیرت چھا جاتی ہے۔

شفق: طلوعِ آفتاب اور غروبِ آفتاب کے وقت آسمان پر سُرخی چھا جاتی ہے، جسے شفق کہا جاتا ہے۔

لذّت گیرِ وجود ہر شے
سر مستِ مئے نمود ہر شے

تشریح:

یہ سب مناظرِ قدرت دیکھ کر معلوم ہوتا ہے کہ کائنات کی ہر شے وجود کی لذّت سے سرشار ہے اور اپنی نمُود و نمائش (اپنے وجود کے اظہار یعنی خود کو ظاہر کرنے کے عمل) میں سرمست ہے، اِس سے زیادہ اور کُچھ نہیں چاہتی۔ وہ محض اپنے موجود ہونے کو غنیمت جانتی ہے اور اپنے ظہور ہی کو اپنی معراج سمجھتی ہے۔

کوئی نہیں غم گُسارِ انساں
کیا تلخ ہے روزگارِ انساں!

تشریح:

لیکن حضرتِ انسان کا حال دُنیا کی تمام اشیاء سے مختلف ہے۔ کائنات کی ہر شے اپنی ہستی نمایاں کررہی ہے اور جو اندازہ اُس کے لیے مقرر ہوگیا، اُس پر چل رہی ہے، لیکن اللہ تعالی نے انسان کو شعور عطا فرمایا ہے۔ وہ اپنی اور کائنات کی حقیقت معلوم کرنا چاہتا ہے اور اِس معاملے میں کائنات کی کوئی شے اُس کی غمگُسار یا اس تحقیق میں اُس کی شریکِ حال نہیں ہے۔ چاروں طرف بے شمار مظاہرِ فطرت ہونے کے باوجود انسان کائنات کے رازوں کو پانے کے معاملے میں ضرور یکا و تنہا ہے۔اس لیے انسان کی زندگی، سراپا پیچ و تاب اور سوز و اضطراب کا شکار ہے۔