ضربِ کلیم 46: تقدیر (ابلیس و یزداں)

اے خدائے کُن فکاں! مجھ کو نہ تھا آدم سے بَیر
آہ! وہ زندانیِ نزدیک و دُور و دیر و زُود

تشریح:

ابلیس خدا کے حضور میں گِڑ گِڑا رہا ہے کہ اے وہ خدا! جس نے کن (ہو جا) کہا تو فکاں (سب کچھ) ہوگیا ( یعنی خدائے کن فکاں) کہ جس نے ساری کائنات اور اس میں جو کچھ ہے، پیدا کیا ہے۔ مجھے آدم سے کوئی دشمنی (بیر) نہ تھی، کہ جب تُو نے مجھے حکم دیا کہ اسے سجدہ کرو تو میں نے نہیں کِیا، میرا یہ انکار دشمنی کی وجہ سے نہ تھا۔ مجھے آدم سے دشمنی کی ضرورت ہی کیا تھی کہ وہ تو خود نزدیک اور دور، جلدی اور دیر کے (زندانیِ نزدیک و دُور و دیر و زُود) یعنی زمان ومکان کے گورکھ دھندوں میں پھنسا ہوا ہے۔

حرفِ ’اِستکبار‘ تیرے سامنے ممکن نہ تھا
ہاں، مگر تیری مشیّت میں نہ تھا میرا سجود

تشریح:

اور نہ ہی مجھ میں اس قدر جسارت ہو سکتی ہے کہ میں تیرے سامنے صاف لفظوں میں تیرے حکم کی تعمیل سے انکار کرتا۔ لیکن یہ انکار جسے اے خدا تُو ”حرفِ استکبار“ سے تعبیر کرتا ہے، اس لیے سرزد ہوا کہ تیری مشیّت (مرضی / ارادہ) ہی یہ نہ تھی کہ میں آدم کو سجدہ کرُوں، یعنی میں تو یہ سمجھتا ہوں کہ میرا سجدہ نہ کرنا تیری مرضی اور ارادے کے مطابق تھا، پس میں کسی طرح قابلِ سرزنش نہیں ہوں۔

وَإِذْ قُلْنَا لِلْمَلَائِكَةِ اسْجُدُوا لِآدَمَ فَسَجَدُوا إِلَّا إِبْلِيسَ أَبَىٰ وَاسْتَكْبَرَ وَكَانَ مِنَ الْكَافِرِينَ

اور جب ہم نے حکم دیا فرشتوں کو کہ سجدہ کرو آدم کو تو سب سجدہ میں گِر پڑے سوائے ابلیس کے، اس نے انکار کیا اور تکبر (غرور) کیا اور اس تکبر کی بنا پر کافروں میں شامل ہو گیا۔
(القرآن: سورۃ البقرہ: آیت نمبر 34)

کب کھُلا تجھ پر یہ راز، انکار سے پہلے کہ بعد؟

تشریح:

خدا (یزداں) شیطان کی اس صفائی پر، جو اس نے مذکورہ بالا اشعار میں دی ہے اس سے پوچھتا ہے کہ اچھا، اے ابلیس ذرا یہ تو بتا کہ ہماری مشیّت (مرضی / ارادہ) کا یہ راز، جس کا تُو اب ذکر کر رہا ہے، تیرے آدم کو سجدہ کرنے کے انکار سے پہلے کھلا یا بعد میں؟

بعد، اے تیری تجلّی سے کمالاتِ وجود!

تشریح:

(خدا کے اس سوال پر ابلیس جواب دیتا ہے کہ) اے ذاتِ اقدس! ہستی کے تمام کمالات تیری ہی تجلّی کا کرشمہ ہیں، یہ راز مجھے پر انکار کے بعد کھُلا۔

پستیِ فطرت نے سِکھلائی ہے یہ حُجتّ اسے
کہتا ہے ’تیری مشیّت میں نہ تھا میرا سجود

تشریح:

اللہ تعالی نے ابلیس کا جواب سن کر فرشتوں کی طرف دیکھا اور ان سے مخاطب ہو کر فرمایا: سن رہے ہو یہ کیا عرض کر رہا ہے! اس کی فطرت کی پستی نے اِسے یہ دلیل سکھائی ہے کہ ”میں انکار پر مجبور تھا، کیونکہ تیری مرضی ہی نہ تھی کہ میں آدم کو سجدہ کروں“۔ انکارِ سجدہ اس نے اپنی مرضی سے کیا اور اب بہانہ کر رہا ہے کہ اے خدا! میں نے جو کچھ کیا تیری مرضی سے کیا ہے یعنی تیرے ارادے اور مرضی میں اگر میرا آدم کو سجدہ کرنا ہوتا تو میں ضرور آدم کو سجدہ کرتا، اس کی یہ بات بالکل غلط ہے۔

دے رہا ہے اپنی آزادی کو مجبوری کا نام
ظالم اپنے شُعلۂ سوزاں کو خود کہتا ہے دُود!

تشریح:

دیکھو تو یہ فریب خوردہ کس قدر دروغ گوئی سے کام لے رہا ہے، اپنی کردہ گناہی کو خدا کی تقدیر بنا کر پیش کر رہا ہے اور تقدیر کا غلط مفہوم بتا رہا ہے۔ میں نے اس کو اس معاملہ میں آزادی دی تھی، یعنی اُسے اختیار بخشا تھا، خواہ یہ سجدہ کرے یا نہ کرے۔ یہ ظالم اپنے شعلۂ سوزاں کو خود ہی دھوئیں سے تعبیر کر رہا ہے، اختیار کو جبر سے تعبیر کر رہا ہے، آزادی کو مجبوری کا نام دے رہا ہے— یعنی سراسر غلط بیانی کر رہا ہے، خود ہی اپنے وقار اور مقام کی تذلیل کر رہا ہے۔