بالِ جبریل 160: خوشحال خاں کی وصیّت

قبائل ہوں ملّت کی وحدت میں گُم
کہ ہو نام افغانیوں کا بلند

تشریح:

اِس نظم میں اقبالؔ نے سرحد کے مشہور وطن دوست شاعر خوشحال خاں کے جذبات کو اپنے انداز میں نظم کیا ہے۔ فرماتے ہیں کہ خوشحال خاں نے مرتے وقت سرحد کے افغانی قبائل کو یہ وصیّت کی کہ:-

اے مسلمانو! تم نے اپنے آپ کو قبائل میں تقسیم کر کے اپنی قوت کو منتشر کر دیا ہے۔ علاوہ بریں یہ قبائلی زندگی اور جماعتی تقسیمِ مذہب و مِلّت کے اصولوں کے بھی خلاف ہے۔ اس لیے تم سب قبائلی امتیازات کو مِٹا کر ایک قوم بن جاؤ۔

؎ بُتانِ رنگ و خوں کو توڑ کر مِلّت میں گُم ہوجا
نہ تُورانی رہے باقی، نہ ایرانی نہ افغانی
(بانگِ درا: طلوعِ اسلام)

محبّت مجھے اُن جوانوں سے ہے
ستاروں پہ جو ڈالتے ہیں کمند

تشریح:

مجھے اپنے ان نوجوانوں سے محبت ہے جو ستاروں پر کمند ڈالتے ہیں۔ ارضی مملکتیں تو الگ رہیں، یہ نوجوان تو آسمان کو تسخیر کرنے کا حوصلہ رکھتے ہیں اور اپنی حوصلہ مندی و اولوالعزمی کے سبب مجھے بے حد عزیز ہیں۔

مغل سے کسی طرح کمتر نہیں
قہستاں کا یہ بچّۂ ارجمند

تشریح:

میں یہ چاہتا ہوں کہ قہستان (افغانستان کے ایک حصے کا نام) کا ہر نوجوان اپنے اندر عزمِ بلند پیدا کرے اور اس حیققت کو ذہن نشین کرے کہ میں جراءت و بہادری اور پامردی میں مغلوں سے کسی طرح کم نہیں ہوں۔ اس لیے ان کو مجھ پر حکومت کرنے کا کوئی حق نہیں ہے۔

کہوں تجھ سے اے ہم نشیں دل کی بات
وہ مدفن ہے خوشحال خاں کو پسند

تشریح:

اے میرے ساتھی! کیا میں تجھ سے اپنے دِل کی بات کہوں؟ وہ بات یہ ہے کہ خوشحال خاں کو ایسی جگہ دفن ہونا پسند ہے (تفصیل آئندہ شعر میں)

اُڑا کر نہ لائے جہاں بادِ کوہ
مُغل شہسواروں کی گردِ سمند!

تشریح:

کہ جہاں پہاڑ کی ہوائیں مغلیہ شہسواروں کے گھوڑوں کی گرد نہ لا سکیں مراد یہ ہے کہ ایک حُرّیت پسند اور جنگجو کی حیثیت میں خوشحال خاں کا سینہ مغلوں کے خلاف شدید نفرت کی آماجگاہ تھا۔ خوشحال خاں کہتے یہ علاقہ تو خیر تیرا اور میرے ہم وطنوں کا ہے۔ اس پر مغل فوجوں کی یلغار کیسے برداشت ہو سکتی ہے؟ وہ سمجھتے تھے کہ مغلوں نے اس کے ملک پر غاصبانہ قبضہ کر کے افغان باشندوں کی آزادی سلب کر لی ہے۔ یہی وہ جذبہ تھا جس کے تحت وہ ساری عمر مغلوں کے خلاف نبرد آزما رہے۔

1857ء کے استعماری مظالم کے خلاف مسلمانوں کی غیرت کو جھنجھوڑتے ہوئے پروفیسر یوسف سلیم چشتی حاشیے میں لکھتے ہیں:-

نوٹ: کاش ایسی ہی نفرت مسلمانوں کو اس قوم سے ہو جائے جس نے 1857ء میں فرخ آباد (یو-پی) کے مسلمان مجاہدوں کو شکست دینے کے بعد اُن کے سردار کو پہلے سُور کا گوشت کھلایا، پھر اس کی چربی جسم پر ملی، اس کے بعد پھانسی دی۔ کاش وہ دِن جلد ہی آجائے جب قوم کا ہر فرد جذبۂ جہاد سے سرشار ہو جائے۔

پروفیسر یوسف سلیم چشتی، شرح بالِ جبریل